الروتين والملل عند الاطفال

احب اقولكم إن طفل فرط_الحركة طفل تفاعلي يعني بيحبك تشغليه_تخليه يشتغل_ في المذاكرة عشان مخه يركز معاكي كدة ويصحصح.

ايوة يعني اعمل ايه طيب

أولاـ تعرفي إن المكان اللي يذاكر فيه الطفل لازم ولابد يكون بعيد عن المشتتات يعني التليفزيون والتليفون وباب الشقة واخواته. الولد يذاكر في أوضته ومقفول الباب عليه وطبعا انتي معاه مش لوحده عشان لو لوحده هايقوم ياخدله شقلبتين على الماشي مع كام نطة على السرير مع شوية شغبطة على الحيطة وينسى انه كان داخل يذاكر من اساسه.

طب هافضل اذاكر معاه باقي عمري لا طبعا دي فترة وهانعدل سلوكنا بعد شوية ونرجع نخليه يذاكر لوحده.

ثانيا ـ الاوضة لازم يكون فيها سبورة صغيرة او كبيرة ودي مش عشانك انتي دا عشانه هو لانه هايقوم يشرحلك عليها كمان شوية حاجات انتي مش فاهماها.

ثالثاـ اسأليه تحب نبدأ بإيه وتشرب إيه واحنا بنذاكر. دايما كلميه بصفة انه شخص مدرك وانه أكيد هايحتاج يكون مرتاح وهو بيذاكر وانك كنتي بتشربي أي حاجة بتساعدك على التركيز حتى لو كوباية ميه اقنعيه يهييء لنفسه جو مختلف للمذاكرة.

رابعا ـ الالوان مهمة جدا للطفل وهو بيذاكر كراسة الواجب جنبها كراسة تانية بنحل فيها بالالوان ولو الطفل كبير هاتي له أقلام ماركر ملونة يمشي بيها على الكلام ويغير الالوان كل شوية عشان يقرأ وهو مستمتع.

خامسا ـ اشرحله قطعة كويس وبعدين أقنعه إني مش فاهماها واطلب منه يشرحها عملي على سبورته وتكوني في قمة تركيزك وهو بيشرح لانك هاتسأليه على المعاني والحاجات المهمة وهو يستعين بالكتاب عشان يفهمك ويعرفك كل التفاصيل.

سادسا ـ اضافة بعض المرح لايضر يعني شوية هزار في النص حدوتة صغننه بسيطة وكل ربع ساعة نريح ٥ دقايق للطفل الصغير و١٠ دقايق للطفل الكبير.

سابعا ـ الصبر ثم الصبر ثم الصبر ارجوكم مفيش حاجة بتحصل بين يوم وليلة ونمط الطفل اللي اتعودتي عليه فترة كبيرة محتاج فترة مش قليلة عشان يتصلح.

مزيد من الموضوعات هنا 👆 تليجرام هنا 👆

الطفولة المبكرة ونمو شخصية الطفل الموضوع من هنا👆

النمو الاجتماعي لأطفال ما قبل المدرسة. الموضوع من هنا👆

سمات النمو الاجتماعي في مرحلة الطفولة المبكرة . الموضوع من هنا👆

حاجات النمو الاجتماعي للأطفال. الموضوع من هنا👆

مرحلة ما قبل المدرسة. الموضوع من هنا👆

الطفل اللى بيعمل مصايب

غالبا الطفل دا مش متشاف بيعمل الحاجات الغلط دى علشان يقول خدوا بالكم منى اكتر شوية انا تعبان.

مشكلته كمان بتكون أكبر لما يكون اخوه او اخته لافت الأنظار مثلا شكله احلى ،متفوق دراسيا،متميز رياضيا وبياخد بطولات وياسلام بقا لو كل الحاجات دى مجتمعة فى أخوه ولا أخته بيكون حاسس بغيرة شديدة ويغلس على اخوه او اخته بطرق مختلفة علشان تانى يقول انا موجود شوفوا موهبتى واللى بيميزنى ساعدونى اشوف نقاط قوتى اللى ممكن تكون مختلفة عن المجتمع بيحبه ويتفق عليه وينبهر بيه.

مثلا انه يكون حنين ،بيرسم حلو ،بيحب يكتشف فيه نقاط قوة كتير ممكن تكون عنده وماحدش شايفها ,عايز حب واهتمام ويحس انه مميز

عايز يكون متشاف زى اخوه او اخته من باباه وماماته ومن الناس

من الطرق اللى بيعملها الطفل دا ساعات علشان يتشاف انه يحب يشترى حاجات كتير باستمرار علشان دى الحاجة اللى تبهر اصحابه بيه وتعوض النقص اللى هو حاسس بيه

الخلاصة الطفل دا محتاج

١. يتشاف يحس انه يستاهل يتحب ويتقبل زى ماهو

٢. اهتمام وحب أكتر ولعب واستماع لمشاعره وهو حاسس بايه وقت تواصل حقيقى معاه لتلبية احتياجاته النفسية

وانت محتاجة تتعاطفى مع نفسك أكتر وترحميها علشان تقدرى تتعاطفى معاه وترفقى بيه وتلبى احتياجاته النفسية علشان يكون كويس وسوى نفسياوميعملش المصايب اللى بتوجع قلبك كل يوم

حلى المشكلة من الجذور مش من على الوش

ومتكسفيش تطلبى المساعدة